शिव पलाँस अब गायकको रूपमा पनि, ‘तिम्रो सुनको हात्ती’ सार्वजनिक

चैत २१, 

कवि तथा गीतकार शिव पलाँसले औपचारिक रूपमा गायन यात्राको सुरुवात गरेका छन्। उनले आफ्नै रचना र स्वरमा नयाँ गीत ‘तिम्रो सुनको हात्ती’ सार्वजनिक गरेका छन्, जसमा केशव बादीको संगीत तथा संगीत संयोजन रहेको छ। यो गीत पलाँस क्रियशन नामक युट्युब च्यानलमा उपलब्ध छ।

करिब दुई दशकदेखि साहित्यमा सक्रिय पलाँसको गीति संग्रह ‘माया गर्नुको अर्थ’ प्रकाशित भइसकेको छ। उनका ‘माया गर्नुको अर्थ’, ‘बेहोशीमै छोडी गयौ’, ‘गन्दै जाँदा पिरतीमा’, ‘खोकी लाग्दा हररो’ जस्ता चार दर्जनभन्दा बढी गीतहरू रेकर्ड भई बजारमा आइसकेका छन्।

पत्रकारीतामा पनि संलग्न रहेका पलाँसले नयाँ गीतप्रतिको सकारात्मक प्रतिक्रियाले आफूलाई थप उर्जा मिलेको बताएका छन्। उनका अनुसार, समाजमा पैसामुखी प्रवृत्ति र कृत्रिम व्यवहार हावी हुँदै जाँदा मानवता गुम्दै गएको विषय गीतमार्फत उजागर गर्ने प्रयास गरिएको छ।