काठमाडौँ, चैत २९ — हाल कोशी, बागमती र गण्डकी प्रदेशका थोरै स्थानहरूमा हल्कादेखि मध्यम वर्षा भइरहेको छ। मौसम पूर्वानुमान महाशाखाका अनुसार देशको पहाडी भू–भागमा आंशिकदेखि सामान्य बदली रहेको छ भने बाँकी भू–भागमा मुख्यतया सफा वा आंशिक बदलीको अवस्था छ।
महाशाखाले जनाएको छ कि देशमा हाल पश्चिमी वायु, स्थानीय वायु तथा अरब सागरबाट आएको जलवाष्पयुक्त हावाको प्रभाव सक्रिय रहेको छ।
शनिबार सुदूरपश्चिम, कर्णाली र लुम्बिनी प्रदेशका साथै अन्य पहाडी भेगका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। साथै, उच्च पहाडी तथा हिमाली क्षेत्रका थोरै स्थानहरूमा हल्का वर्षा र हिमपात हुन सक्ने अनुमान गरिएको छ।
महाशाखाले हालसम्म देशव्यापी देखिएको तुवाँलो क्रमिक रूपमा कम हुने अपेक्षा गरेको छ।
वर्षा, चट्याङ र हिमपातका कारण दैनिक जनजीवन, स्वास्थ्य, कृषि, सडक तथा हवाई यातायातमा असर पर्न सक्ने भन्दै महाशाखाले आवश्यक सतर्कता अपनाउन आम नागरिकलाई अनुरोध गरेको छ।
Posts
