विभागका महानिर्देशक चण्डीप्रसाद घिमिरेका अनुसार अनुसन्धानका क्रममा प्राप्त प्रमाणहरूका आधारमा पौडेल नै मुख्य योजनाकार रहेको पुष्टि भएको छ। पौडेलविरुद्ध पक्राउ पुर्जी जारी भइसकेको छ, र उनको खोजी तीव्र पारिएको छ। विभागले प्रहरीलाई पत्राचार गर्दै उनी फरार रहेको र सम्भवतः भारतमा लुकेको हुन सक्ने जानकारी गराएको छ।
२५ करोडको तस्करी प्रकरण अनुसन्धानका क्रममा प्रहरीले गत चैत्र ४ गते टोखा नगरपालिका–२ झोरबाट २५ करोड १९ लाख २४ हजार ९५० रुपियाँ बराबरको विदेशी मुद्रा बरामद गरेको थियो। ना७ख १६५२ नम्बरको ट्रकमा लुकाइँदै लगिएको रकमसहित प्रहरीले ट्रक चालक कुसाङ लामालाई पक्राउ गरी अनुसन्धान अघि बढाएको थियो।
राजस्व अनुसन्धान विभागका अधिकारीहरूका अनुसार अनुसन्धान टोलीले लामाको मोबाइल कल विवरण, डिजिटल साक्ष्यहरू, सीसीटीभी फुटेज, र अन्य प्रमाणहरूको विश्लेषण गरी पौडेलको संलग्नता पत्ता लगाएको हो। साक्ष्यहरूले देखाएअनुसार, घटनाको केही समय अघि लामाले पौडेलसँग बारम्बार सम्पर्क गरेको थियो। थप अनुसन्धानका क्रममा पौडेलको घर, व्यावसायिक स्थलहरू, र गोदामहरूमा खानतलासी गरी थप प्रमाणहरू सङ्कलन गरिएको छ।
अनुसन्धानकर्ताहरूका अनुसार तस्करीको यो जालोमा पौडेल मात्र नभई अन्य व्यवसायी र समूहहरू समेत संलग्न हुनसक्ने आशंका गरिएको छ। यसअघि पनि उनी विभिन्न तस्करी तथा अवैध कारोबारहरूमा मुछिएका थिए। २०५९ सालमा हङकङमा अवैध डलर कारोबारमा पक्राउ परेका उनले ऊन आयातको नाममा एलसी खोली डलर तस्करी गरेको आरोप लागेको थियो। त्यस्तै, २०८० असारमा उनी महाराजगञ्जमा जुवा अखडा सञ्चालन गरेको आरोपमा पक्राउ परेका थिए।
राजस्व अनुसन्धान विभागले पौडेलको सम्पत्ति रोक्का गर्न पहल थालेको छ भने पक्राउ परेका कुसाङ लामासहित अन्य संलग्नहरूमाथि विदेशी विनिमय अपचलनसम्बन्धी मुद्दा दायर गर्ने तयारी गरेको छ। साथै, अनुसन्धानको दायरालाई थप विस्तार गर्दै अन्य संलग्न समूहहरू पहिचान गर्न प्रयास भइरहेको छ।
.jpeg)
Posts
