बैतडीमा जीप दुर्घटना हुँदा एक जनाको मृत्यु भएको छ भने तीनजना घाइते भएका छन्।
दुर्घटना शुक्रबार राति दशरथचन्द नगरपालिका–११ स्थित नानीगाड भन्ने स्थानमा भएको हो। देहिमाण्डौँबाट गिरेगडा जाँदै गरेको बीएसी ५६५९ नम्बरको बोलेरो जीप सडकबाट करिब ४० मिटर तल खसेको जिल्ला प्रहरी कार्यालय बैतडीले जनाएको छ।
दुर्घटनामा परेर पञ्चेश्वर गाउँपालिका–५ का ५४ वर्षीय चन्चले दयालको मृत्यु भएको छ। प्रहरीका अनुसार उहाँको जिल्ला अस्पतालमा उपचारका क्रममा राति नै मृत्यु भएको हो।
यस्तै दुर्घटनामा पञ्चेश्वरकै ५२ वर्षीय लालीराम कोली, ३५ वर्षीय चालक राकेस कोली, र दशरथचन्द नगरपालिका–१० की ३० वर्षीया कविता परियार घाइते भएका छन्। उनीहरूको जिल्ला अस्पताल बैतडीमै उपचार भइरहेको छ।
प्रहरीका अनुसार जीपमा चालकसहित चारजना मात्र सवार थिए। गाडी अनियन्त्रित भएर सडकबाट तल खसेको प्रारम्भिक जानकारी छ। घटनाबारे थप अनुसन्धान भइरहेको प्रहरीले जनाएको छ।
.jpeg)
Posts
