अस्पतालको लापरबाहीले बिरामीको मृत्यु भएपछी अदालतमा मुद्दा, ५ करोड क्षतिपूर्तिको माग

मोरङ, चैत २१ – चिकित्सकीय लापरबाहीका कारण बिरामीको मृत्यु भएको भन्दै पीडित पक्षले मोरङ जिल्ला अदालतमा क्षतिपूर्तिको मागसहित मुद्दा दायर गरेका छन्।

सुनसरी इनरुवाकी ५६ वर्षीय बिमला थापा पोखरेलको विराटनगर–४ स्थित नोबेल मेडिकल कलेज एन्ड टिचिङ हस्पिटल मा उपचारका क्रममा मृत्यु भएको थियो। श्वासप्रश्वास तथा फोक्सोसम्बन्धी समस्या लिएर भर्ना भएकी पोखरेलको गलत औषधी सेवनका कारण ज्यान गएको परिवारको आरोप छ। मृतकका श्रीमान् महेश्वर पोखरेलले दोषी चिकित्सकमाथि कारबाहीको माग गर्दै पूर्ण न्याय दिलाउनुपर्ने भनी अदालतमा फिरादपत्र दर्ता गराएका छन्।

गलत औषधीको प्रयोग, गम्भीर लापरबाहीको आरोप

मृतक पोखरेलको फोक्सोमा दीर्घकालीन अवरोध (COPD) तथा रक्तअल्पताको समस्या देखिएपछि अस्पतालका श्वासप्रश्वास रोग विशेषज्ञ डा. रामहरि घिमिरे र डा. रुपक केसीले उपचार गरेका थिए। करिब एक हप्तापछि सुधार देखिएपछि माघ १८ गते उनलाई डिस्चार्ज गर्न सिफारिस गरिएको थियो। तर, ढाड दुखाइको समस्या समाधान गर्न भन्दै मोर्फिन नामक औषधी लेखिएपछि ज्यान गएको आरोप परिवारको छ।

मृतकका छोरा सुशान्तरमण पोखरेलका अनुसार, मोर्फिन अत्यधिक शक्तिशाली औषधी हो, जुन श्वासप्रश्वासका बिरामीलाई दिन नहुने चिकित्सकीय मान्यता छ। तर, बिरामीलाई ५० एमजी टिडिएसको दरले औषधी सिफारिस गरिएको थियो, जुन घातक साबित भयो।

‘‘आमा ठीक भएर घर फर्किन तयार हुनुहुन्थ्यो। तर, गलत औषधीका कारण श्वासप्रश्वासको समस्या फेरि बढ्यो। नर्सहरूलाई पटक–पटक जानकारी गराउँदा पनि बेवास्ता गरियो। अन्ततः बिरामी बेहोस भएपछि मात्र आइसियूमा लगियो, तर केही समयमै मृत घोषणा गरियो,’’ सुशान्त पोखरेलले पत्रकार सम्मेलनमा बताए।

अस्पतालको प्रतिक्रिया: अनुसन्धान भइरहेको दाबी

मृत्यु प्रकरणपछि अस्पताल प्रशासनले यस विषयमा अध्ययन भइरहेको जनाएको छ। नोबेल मेडिकल कलेजका महाप्रबन्धक दिपेश राईका अनुसार, घटनाको विषयमा आवश्यक कागजातहरू संकलन गरी अस्पतालले आफ्नो आधिकारिक धारणा सार्वजनिक गर्ने तयारी गरेको छ।

‘‘बिरामीको मृत्युपछि परिवारले सहजै शव बुझेर लगेको देखिन्छ। त्यसबेला अस्पतालमा कुनै औपचारिक उजुरी आएको थिएन। अहिले अदालतमा मुद्दा परेपछि हामी पनि गम्भीर भएर अध्ययन गरिरहेका छौँ,’’ महाप्रबन्धक राईले भने।

५ करोड क्षतिपूर्तिको माग

मृतकका परिवारले संविधानको धारा ४२ (२), उपभोक्ता संरक्षण ऐनको दफा ५० र ५१ अनुसार क्षतिपूर्तिको माग गरेका छन्। उनीहरूले ५ करोड रुपैयाँ क्षतिपूर्ति असुलउपर हुनुपर्ने मागसहित अदालतमा मुद्दा दायर गरेका हुन्।

मोरङ जिल्ला अदालतमा यस प्रकारको चिकित्सकीय लापरबाहीसम्बन्धी मुद्दा पहिलो पटक दर्ता भएको हो। परिवारको भनाइ अनुसार, अदालतमा मुद्दा दर्ता गराउन निकै संघर्ष गर्नु परेको थियो।

अब अदालतको फैसलाले चिकित्सकीय लापरबाहीको यो गम्भीर घटनामा न्याय दिलाउने वा नदिलाउने टुंगो लाग्नेछ।