सामुदायिक विद्यालयमा बेरुजुको चाङ, कुनामा कति ?

चैत २३ गते, कालीकोट — कालीकोट जिल्लाका सामुदायिक विद्यालयहरूले हालसम्म १४ करोड २० लाख ५० हजार रुपैयाँ फस्र्योट नगरेको पाइएको छ। यो रकम विद्यालय भौतिक पूर्वाधार निर्माणका लागि तत्कालीन जिल्ला शिक्षा कार्यालयबाट पेस्कीस्वरूप वितरण गरिएको थियो।

राज्य पुनर्संरचनाको नौ वर्षपछि पनि ती पेस्की रकमहरू फस्र्योट नभएकाले हालसम्म पनि बेरुजु यथावत रहेको छ। शिक्षा तथा मानव स्रोत विकास केन्द्रले शिक्षा विकास तथा समन्वय इकाइ कालीकोटलाई पेस्की फस्र्योटको ताकेता गरेपछि यो तथ्य सार्वजनिक भएको हो। ताकेतापछि समन्वय इकाइले चैत ३० गतेभित्र सबै विद्यालयलाई फस्र्योट गर्न सार्वजनिक सूचना समेत जारी गरेको छ।

२०७० सालदेखि २०७४/७५ सम्मको अवधिमा लिइएका ती पेस्की फस्र्योट नहुनुको कारण शिक्षक संगठनका नेताहरूबीचको भागबण्डा, काम नगरेका विद्यालयको खातामा रकम जम्मा गरिनु, र बिल भरपाई नहुनु रहेको कार्यालय स्रोत बताउँछ।

समन्वय इकाइ कालीकोटका निमित्त प्रमुख प्रकाशचन्द्र धितालले पटक–पटक स्थानीय तहमार्फत जानकारी गराउँदा पनि विद्यालयहरूले चासो नदेखाएपछि सञ्चारमाध्यमबाट सूचित गर्न बाध्य भएको जानकारी दिनुभयो।

कुन पालिकामा कति बेरुजु?

नरहरिनाथ गाउँपालिका: ३ करोड ८० लाख (सबैभन्दा बढी)
महावै गाउँपालिका: १० लाख २५ हजार (सबैभन्दा कम)
खाँडाचक्र नगरपालिका: १ करोड ९९ लाख ७५ हजार
पलाँता गाउँपालिका: १ करोड ७४ लाख
सान्नीत्रिवेणी गाउँपालिका: १ करोड ७३ लाख
रास्कोट नगरपालिका: १ करोड ५५ लाख ५० हजार
तिलागुफा नगरपालिका: १ करोड ३९ लाख २५ हजार
पचालझरना गाउँपालिका: १ करोड १६ लाख २५ हजार
शुभकालिका गाउँपालिका: ६० लाख ७५ हजार

शैक्षिक सरोकारवालाहरूका अनुसार विकासे बजेटलाई शिक्षक तलबभत्तामा खर्च गरिएको, निजी स्रोतबाट शिक्षक राखिएको, र योजनाबद्ध ढंगले काम नगरेको हुँदा यस्तो समस्या देखिएको हो।

कर्णाली एकीकृत ग्रामीण विकास तथा अनुसन्धान केन्द्र (किर्डाक) नेपाल कालीकोटका जिल्ला संयोजक तुलाराम पाण्डेले भौतिक पूर्वाधारका लागि लिएको बजेट अन्यत्र खर्च गर्ने प्रवृत्तिले बेरुजु बढाएको बताए।