चैत २३ गते,
आज चैत्र शुक्ल अष्टमीका दिन नेपालीले श्रद्धापूर्वक चैते दसैँ पर्व मनाउँदै छन्। घरघरमा नवदुर्गा भगवतीको पूजा–आराधना गरिँदैछ।
धार्मिक मान्यताअनुसार वर्षमा चारपटक नवरात्र पर्ने भए पनि आश्विन र चैत्र शुक्ल पक्षका नवरात्रहरू विशेष रुपमा प्रचलित छन्। आश्विन शुक्लमा घटस्थापना गरेर मनाइने बडादसैँजस्तै, चैत्र शुक्ल अष्टमीमा मनाइने यस पर्वलाई चैते दसैँ भनिन्छ।
चैते दसैँको अवसरमा राजधानीको हनुमानढोकास्थित दसैँघरमा घटस्थापना गरी विधिपूर्वक पूजा र बलि दिने परम्परा कायमै छ। अष्टमीमा चैते दसैँ मनाइन्छ भने नवमीका दिन त्रेतायुगमा भगवान रामको जन्म भएको विश्वासका साथ रामनवमी पर्व पनि मनाइन्छ।
बडादसैँ जस्तै, चैते दसैँमा पनि यो लोकमा सुख र परलोकमा सद्गतिको कामना गर्दै देवीको कृपा प्राप्त गर्न पूजा–अर्चना गरिन्छ। यस अवसरमा परिवारबीच जमघट हुने, शक्तिपीठमा गई दर्शन गर्ने चलन पनि देखिन्छ।
काठमाडौं उपत्यकाको गुह्येश्वरी, नक्साल भगवती, भद्रकाली, शोभा भगवती लगायतका मन्दिरमा विशेष पूजा भइरहेको छ। उपत्यका बाहिर पलाञ्चोक भगवती, चण्डेश्वरी, मनकामना, वागेश्वरी, कालिका लगायत शक्तिपीठमा पनि भक्तजनको भीड लागेको छ।
चैत्र शुक्ल प्रतिपदादेखि दसैँघरमा दुर्गा सप्तशती, चण्डी पाठ चलिरहेको छ। विसं २०६३ सम्म नारायणहिटी दरबारअन्तर्गत रहेको दसैँघर अहिले संस्कृति, पर्यटन तथा नागरिक उड्डयन मन्त्रालयको मातहतमा रहेको छ।
.jpeg)
Posts
