इलाका प्रहरी कार्यालय कोहलपुरले सुर्खेतको भेरीगंगा नगरपालिका–७ काठेघारी घर भई कोहलपुर नगरपालिका–५ मा डेरा गरी बस्दै आएका ४१ वर्षीय राम बहादुर बुढा क्षेत्रीलाई नियन्त्रणमा लिएको हो। उनले विभिन्न विदेशी नम्बर प्रयोग गर्दै धम्कीपूर्ण सन्देश पठाएर फिरौती मागेको खुल्न आएको छ।
प्रहरी अनुसन्धानका अनुसार क्षेत्रीले आफूलाई ‘लोरेन्स बिस्नोई’ र ‘अनमोल बिस्नोई’ भएको दाबी गर्दै पैसा नदिए गम्भीर परिणाम भोग्नुपर्ने चेतावनी दिएका थिए। प्रारम्भिक अनुसन्धानमा उनले प्रयोग गर्ने मोबाइलमा विदेशी नम्बरद्वारा सञ्चालित व्हाट्सएप एकाउन्ट भेटिएको प्रहरी प्रमुख डिएसपी धर्मराज भण्डारीले जानकारी दिनुभयो।
यसअघि पनि विभिन्न आपराधिक क्रियाकलापमा संलग्न रहेको क्षेत्रीमाथि देशभरका विभिन्न स्थानमा हत्यासम्बन्धी तथा जबरजस्ती चोरी, फिरौती असुली, अपहरण जस्ता गम्भीर मुद्दा दर्ता छन्। काँकडभिट्टाबाट एक नेपाली युवतीलाई भारत लगी बेचबिखन गर्न खोजेको आरोपमा उनीविरुद्ध मानव बेचबिखन मुद्दा दर्ता भएको छ। साथै, झापामा चन्दा असुली, काठमाडौंमा अपहरण र फिरौती असुली तथा सुर्खेतमा गोली हानी हत्या गरेको अभियोगमा समेत उनी संलग्न रहेको प्रहरीले जनाएको छ।
नेपाल आर्मीमा भर्ना भए पनि छोटो समयमै भागेका क्षेत्री पछिल्लो समय आपराधिक गिरोहहरूसँग मिलेर विभिन्न गैरकानुनी गतिविधिमा संलग्न हुँदै आएका थिए। उनले भारतीय आधार कार्ड र विदेशी नम्बरका व्हाट्सएप एकाउन्टहरू प्रयोग गरी आपराधिक गतिविधि सञ्चालन गर्ने गरेको अनुसन्धानबाट खुलेको छ।
हाल उनलाई नियन्त्रणमा राखेर थप अनुसन्धान भइरहेको इलाका प्रहरी कार्यालय कोहलपुरले जनाएको छ।
.jpeg)
Posts
